وايه المشكلة سابك وحب غيرك عايزة ايه

أنا تعبانة جداً.. مشكلتي مُعقّدة أوي، ومش عارفة المفروض أعمل إيه.. أنا بحب واحد جداً، شُفت معاه أيام جميلة جداً وأهله بيحبوني ويحترموني، وفجأة اتغير معايا أوي، وسابني لمشكلة تافهة؛ إني نسيت أبعت له رسالة أقول له إني خلاص نزلت، وأهله وقفوا جنبي بجد، والكل وقف ضده، ومن كتر ضغطه بالكلام عليّ تعبت بجد، وقلت له أنا مش مسامحاك، وضغطت عليه أكتر قلت له: منك لله.

كنت تعبانة أوي، وبِعِدنا بسبب الكلام اللي قلته ده، وبعدها اتكلمنا تاني، وعرفت إنه رجع لبنت كان يعرفها؛ فانفعلت عليه بكلام كتير يوجع؛ أنا عارفة إنه كلام قاسي أوي؛ بس ده من كتر ما هو وجعني، وقال لي: لو جيتي لي بتراب الفلوس مش عايزك؛ الكلمة وجعتني بجد؛ خصوصاً إن روحي فيه، أنا كمان قلت له: إنت مش راجل وأنا غلطانة إني عرفت واحد زيك، نزلت من مستوايا؛ مع إنه الحمد لله مستواه كويس جداً ويمكن أفضل مني.

وسافر ورجع، ومدة سفره كان فيه رقم بيبعت لي رسايل، وأنا مش أعرف مين، ولما رجع كلّمني، وقال لي: إن فيه رقم بيبعت له رسايل تهديد، وبيقول له إنه صاحبتي، وطلع نفس الرقم اللي بيبعت لي، وكان لسه معاها، وحصلت بينهم مشكلة واليوم اللي سابها فيه، بطّلت الرسايل تيجي لي وتيجي له، وفهمنا إنها كانت بتحاول تكرّهوا فيّ، وبعدين اتعاتبنا، وكنا قرّبنا نرجع، وأنا سامحته، ولقيت البنت بتكلمني، وبتقول لي: ابعدي.

المهم هو دلوقتي جالي وقال لي إنه عايزني وبيحبني؛ حتى البنت دي مع إنه يعرفها قبلي بكتير؛ بس هو بيحبني؛ لكن لسه شايل مني أوي بسبب الكلام اللي قلته له؛ لأنه اتصدم لما سمعه مني؛ خصوصاً إن عمري ما كنت باعلّي صوتي عليه مهما حصل.

ودلوقتي إحنا مرتبطين؛ بس مع الأسف، طريقته متغيرة أوي؛ كل ما يتكلم يقول لي: مش عارف أبعد عنك، ولا عارف أقرّب منك، مش عارف أنسى إنك غلطتِ فيّ، وحاولي تنسّيني ده.

وأنا مش عارفة أعمل إيه عشان أنساه، ومش عارفة أبعد عنه، بحبه أوي.. والمشكلة التانية إن البنت اللي كان يعرفها دي عمّالة تتكلم مع أصحابي، وتحاول تكلّمني على النت وتقول لي إنه مش كويس وابعدي عنه، وأنا عارفة إني لو بعدت هتروح هي تكلمه وتحاول ترجع له زي ما عملت قبل كده؛ بس مش قادرة برضه أكدّب كلامها، وده عمل لي مشكلة معاه، وبيقول لي: إنتِ نكدية وقلّابة وبتسمعي للناس.

أعمل إيه؟ أنا تعبانة ومخنوقة، أتصرف إزاي وأنساه إزاي؟